Patró

By guffi | July 30, 2010

Ristjórinn fyrrverandi Jónas Kristjánsson hefur líklega verið í fýlu í sumarfríinu sínu. Hann virðist hafa verið í ferðalagi um sunnanverða Vestfirði og lætur geðvonskuna bitna á Patreksfirði.

Patreksfjörður minnti á Flateyri. Byggilega landið á eyrinni að mestu komið í eyði. Byggðin hefur þanizt upp um fjallshlíðar. Vonandi verða þar engin skriðuföll. Fátt er að finna á eyrinni nema fiskverkun. Enga miðbæjarsækna þjónustu, en nóg af auðum lóðum. Benzínstöð, bakarí, kaupfélag og kaffihús eru hér og þar austast í bænum. Þaðan er stytzt að flýja til Brjánslækjar, þar sem ferjan bíður. Skrítið að hafa miðbæinn í bláendanum. Bíldudalur er huggulegri, þar er kaffihúsið í miðju. Þar fá menn ókeypis nettengingu með matnum, 700 krónur á Patró. Ódýrara þó en 1000 krónu okrið á ferjunni.

Í fyrradag keyrði ég um sunnanverða Vestfirði í fyrsta skipti í líklega ein 16 ár og gæti ekki verið meira ósammála Jónasi. Einhver þarf líka að minna fúllynda ferðamanninn á orðatiltækið It´s the journey, not the destination.

Hér kemur mín upplifun af sunnanverðum Vestfjörðum.

Ég sannfærði Trausta frænda um að leggja á sig ca. 180 kílómetra ferðalag til Patreksfjarðar af því að ég hafði heyrt að sundlaugin þar væri ein sú glæsilegasta á landinu.

Á leiðinni til Patreksfjarðar pikkuðum við upp tvo danska ferðamenn. Mikael og Jonas sem voru á bakpokaferðalagi um Vestfirði. Þeir voru á leiðinni að fossinum Dynjandi, sem ég er alinn upp við að vita að sé fallegasti foss landsins. Og þar sem við Trausti höfðum allan tímann í heiminum ákváðum við að stoppa hjá fossinum með þeim dönsku og labba upp að honum.

Á leiðinni til Patreksfjarðar keyrðum við í gegnum Bíldudal og framhjá Tálknafirði, þar sem við stoppuðum svo á bakaleiðinni. Við létum Mikael og Jonas út á Patreksfirði. Þeir voru á leiðinni á Látrabjarg.

Og þá var komið að eiginlegum tilgangi ferðalagsins. Sund á Patró. Sundlaugin sem var vígð árið 2005 er án alls vafa sú allra flottasta sem ég hef komið í. Og þá er það ekki vatnið eða pottarnir sem ráða því, heldur það bæjarstæði sem sundlauginni hefur verið valið. Sundlaugin var reist ofarlega í bænum. Stendur við hliðina á kirkjunni og er það lágreist að frá sundlauginni og pottunum er fullkomið útsýni yfir fjörðinn.

Að internetið eigi ekki til myndir máli mínu til stuðnings er miður. Ég hugsa að sundlaugin á Hofsósi sé eina laug landsins sem hugsanlega geti toppað þetta magnaða útsýni. En þangað á ég ennþá eftir að koma.

Við stoppuðum í pítsu á veitingastaðnum Þorpið og keyrðum nokkra hringi um bæinn áður en við yfirgáfum Patreksfjörð.

Ef menn vilja vera í fýlu og sjá ekkert annað en N1 sjoppur á þjóðveginum þá er það ekkert mál. En þá missa menn einfaldlega af því sem vert er að sjá. Á Patreskfirði er til dæmis mjög blómleg fiskvinnsla og öll sú starfsemi og þjónusta við slíkt fyrirtæki er ávallt mikil. Gamli skautar líka full frjálslega yfir í umfjöllun sinni um þjónustuna á svæðinu, sem er mjög myndarleg. Enda hefði nánari umfjöllun ekki hentað skrifunum hans.

Og svo má ekki gleyma að svæðið er algjör náttúruperla. Fossinn Dynjandi, Rauðisandur, Látrabjarg er allt í nánasta nágrenni. Að ekki sé minnst á fæðingarstað Jóns Sigurðssonar forseta, Hrafnseyri við Arnarfjörð ekki Dýrafjörð eins og frægt er orðið.

Svo má ekki gleyma að Patreksfjörður, Tálknafjörður og Bíldudalur eru eins og Hafnarfjörður, Seltjarnarnes og Mosfellsbær. Þetta er eitt og sama atvinnusvæðið með svipaðar vegalengdir á milli sín.

Það sama er hægt að segja um Flateyri sem Jónas ákveður að traðka aðeins á í leiðinni. Flateyri tilheyrir sveitarfélaginu Ísafjörður. Þangað er kannski 15-20 mínútna ökuferð frá Ísafirði. Miðbærinn á Flateyri er gamall og húsunum afskaplega vel við haldið. Þangað finnst mér alltaf mjög gaman að koma því bærinn er svo fallegur.

Ég náði ekki að gera nema brotabrot af því sem ég hafði ætlað mér í ferðinni. Það er greinilegt að þangað þarf að fara aftur og gefa sér mun betri tíma og fleiri daga. Við snérum til baka til Bolungarvíkur eftir 9 tíma ferðalag. Þá hafði ríkt þögn í rúman hálftíma eða þangað til Trausti sagði Við hefðum getað keyrt suður, farið í sund þar og keyrt aftur til baka.

…….En ég hugsa að hvorugur okkar hefði viljað það.

Topics: Daglegt líf | 8 Comments »